TUALTHAHNA PHENA THURÛK

*TUALTHAHNA PHENA THURÛK*




Ruah a sur cherh cherh a. Khawlaiah chuan chhum leivak a zing chéi chuai a. Ka thil tih tur leh khaw awmdan chuan inremna riau a nei ni hian ka hria a. Ka chuanna taxi chu a ding a, darthlalang chhanah chuan ka hmaa gate lianpui lam chu ka thlir phei a. Chu gate lianpui chungah chuan ‘Central Jail’ tih hi a inziak kulh a.

.

Gate hmaa ka va din hnu chuan ka lam panin tang veng pakhat a lo kal a. Ka lehkha pawimawh kente chu ka lo entir a. Ani chuan ka kalna tur hmun min hrilhin min kawhhhmuh a. Ruah sur cherh cherh hnuaiah chuan Central Jail chhungah chuan ka pen lut ta a.

.

Kum a liam ta, Mizoram pumpui nghawr nghing dawt thei tualthahna rapthlak thlen zan kha. Chumi zan chuan college kan kalpui thin thianpa Buangpuia`n min rawn bia a, Kolasib atanga a lo chhoh thu leh a tuka chhuk leh nghal mai a tum thu te, chumi a nih avanga tlawh ngei tura min duh thu a rawn sawi a. Pawlkut thla a ni a, khua a vawt si a, tum lawk pawh ni lem lova zana han teichhuah chu ka phurlo khawp mai.

.

Phur zanlo zetin Republic Veng mawnga thianpa Buangpuia awmna lam pan chuan ka inkhalh chhuak a. Ka zuk thlen chuan kan thian dang Adika leh David-a te pawh an lo awm a. Inhmuhkhawm a khatin a remchang bawka tiin Adika te inluah thar Bethlehem Veng ami chu va hmuhpui nghal law law kan rawt a. Kan thianho chuan Bethlehem Veng lam pan chuan kan inkhalh phei leh a. Chutia hlim taka kan thianho Bethlehem venga kan inkawmkhawm lai chuan tualthahna rapthlak a thlen thu chu kan hre ta a.

.

Chanchin kan hriat tirh chuan ka ngaihven tehchiam lo va, mahse thiante`n kal ve an rawt miau avangin tualthahna thlenna hmun Republic Veng lam pan chuan kan inkhalh chhuak ta a.

.

A hmun kan han thlen chuan mipui leh lirthei a mak a maka tam a lo awm a. Mipui karah chuan kan inzep lut a. Mite chuan mi pakhatin chhungkaw pakhat a thah mang vek thu an sawi a. Tualthattu chu kan hma lawka in pakhatah police te chuan luhpuiin an veng zui nghal a ni an ti a. Chu ina luh tum chuan tlangval thinrim insum theilo zualte leh mipui thinrim chu an inhawrkhawm tuau tuau a. Chutih huna kan boruak tawn chu a sang kher mai, a so hulh hulh a ni ber e.

.

Reiloteah chu thil thleng chuan Zoram khawvel a deng chhuak a. Mitin thinlungah rapna, mak tihna, hlauhna leh titna a intuh a. Ka chhungte pawh an bang bik lo, an chanchin thar hriat avang chuan an thinlung a zam a, min ngaihtuah bawk nen, min rawn phone chamchí reng a.

.

Kha zan rapthlak kha hun tamin a liampui ta a. Tunah chuan khami zana awm ve mi tam takte chuan kha an hun tawn kha an hre reng tawh kher lovang. Khatih lai hun ngaihtuah chuan keipawh ka lo danglam ve ta a, tunah chuan ka tui zawng tak hna tha tak ka thawk tawh a, kum khat dawnlai ka hna chu nuam ti takin ka thawk ve ta a. Kha zan rapthlak tak ka hriatrengna pawh ka tlanchhiatsan tawh emaw ka tih laiin, kha hun thim, hun rapthlak tak kha engvanga lo thleng nge a nih hre tura luhchilhlo theilo turin ka hna chuan min nawr let leh thung ta si a ni.

.

India ram Magazine lian ber ber pathum zinga pakhatah crime column ziaktu ka ni a. Investigation neiin India mai nilo, khawvel ram ropui zawkah te pawh ka vak chhuak a, mipui rilru sukthlek kuai her bawih bawih thei thuziak tam tak ka hnutchhiah tawh a. Police ang nilo, journalist ka nihna atang tualthah thubuai tam tak ka chhui a, police te leh court hian a chang chuan thil tha zawk an duh avanga thudik tak an puanchhuah lo tam zia te, tualthahna leh pawikhawihna a thlen hian mipui nawlpui thlirna leh hmuhdan ringawt hi a dik vek ngai lo a ni tih te hrechiangtu leh a taka chung thubuai luhchilh ve thintu chu ka ni.

.

Thawhtanni tuk a ni a. Kan chanchinbua kan hotu lu ber chuan a office-ah min ko va. “In rama tualthahna emaw, inpawngsualna rapthlak ber nia i hriat min han hrilh teh,” a ti a. Ka rilruah chuan kan ram a buai laia kan pi leh pu, kan nu leh pa, ka Mizo puite tawrhna lo nasat zia lehkhabua ka chhiar thinte chu a lo lang a. “Ka pu, i zawhna ka dawn ruala ka rilrua lo lang hmasa ber chu, kan hnam sipai te`n zalenna an sual laia India sipaite Mizo mipuite chunga an chet rawva zia kha a ni,” ka ti a.

.

A tarmit phena a mitmeng bial kel kul chuan mi melh ran ran a, a hmel chu a nur deuh a, a sana bunlai chu a zuk bih zawk a, “Chu thu sawifiah nan chuan hun tlem i nei?” a ti a.

.

Kei chuan, “Ka pu, hun tam chu thu sawi nan chuan ka mamawh lovang. Mizoram ram buai a nih lai khan India sipaite khan pawisawilo mi tam tak an kap hlum a, an sawisa hlum bawk a, ramtuileilova chhuah mi tam tak an nei bawk. Kan hmeichhiate, pitar atanga naupang thlengin an pawngsual a. Chung zawng zawng sawifiah nan chuan Mizoram history ka chhiar pakhata, sap sipai hnuaia British tana Japan ral pawh lo kap ve tawh Mizopa, India sipaite nunrawn zia a taka hmutu ngei thusawi hi a tawk a ni. Chupa chuan heti hian a sawi; “Japan ral dovin Burma ramah ka che ve hrep tawh a, inkahna pui tham tak tak pawh ka tawk a. Japan sipaiin mi an sawisak te pawh ka hmu tawh. Mahse kan khuaa vai sipaiho chet rawnzia leh khawngaihna an neih loh zia kha! Kha aia nunrawnna hleihluak kha ka la hmu ngai lo va, mite sawi pawh ka la hre ngai lo!” a ti a ni. Chu chu mi pakhat thusawi lek chauh a la ni, ka pu,” ka ti a.

.

Ka hmaa putar chu a inngaihtuah vung vung a, a chal a chuar nung a, “Mahni hnam hmangaih tak i ni ngei mai. I thusawi chuan thil tam tak mi ngaihtuah tir bawk. Mahse tuna ka koh chhan che erawh i ram leh i hnamin a lo tawrh tawhna lam ziak tura ka duh vang che a ni lo va. In rama tualthahna emaw inpawngsualna rapthlak thleng ka zawt che a, ka zawhna i chhanna atanga ka hmuh tak erawh, i ram leh hnam i hmangaih zia leh i hnampuite lo tawrh tawhna avanga i thinlung a hliam nasat zia a ni daih mai! Hnam rilru pu mi i nih zia ka hriat phah e. Tunah erawh in rama tualthahna thleng, India mai ni lo khawvel pawhin mak a tih tur chanchin ziak turin ka duh che a ni,” a ti a. Ka hmaah chanchinbu hlui pakhat hi a rawn theh thla a.

.

Chu chanchinbu chu India rama nitin chhuak chanchinbu lian ber a ni a. Chutah chuan Mizoram nghawr nghing dawt thei tualthahhna rapthlak kum 2015 Pawlkut thlaa thleng chu a lo inziak a.

.

Ka hmaa putar thu chuan, “I Mizopuite leh nang leh kei ngei pawhin kan lo hriat tawh thil ziak turin ka ti lo che a. Kha tualthahna phena thuruk thuhruk chu haichhuak a, khawvel hriata tarlang turin ka duh che a ni. I hria a ni tiraw, engkim hi chhan neia tih a ni. Kha tualthahna phenah khan thuruk a awm a, chu chu min hmuh tir rawh le,” a ti a. Ka hna tur chu ka huphurh kher mai. Kha zan rapthlak, theih nise kumkhuaa kalsan ka duh hunah khan kir leh lo thei ka ni dawn ta si lo. Thatho lo zetin kan pu office chu ka chhuahsan ta a.

.

Khami ni a kan pu nena kan inkawm dan leh a office ka chhuahsan laia ka phurloh zia te chu ka hriatrengna chuan a tharin min rawn hriat thar tir a. Kha office ka chhuahsanna kha thla tam a ni ta. Khami ni atang khan hma ka la tan nghal a, vawiinah hian ka hna chu a hmawr bawkin a awm ang em? Khawvelin a hriatloh, kha tualthahna phena thuruk thuhruk chu haichhuah ka tum dawn a ni. Lehkha chinfel ngai leh thil tih ngai apui a tam a, ka hna thawh pakhatah rilru zawng zawng pe thei lova investigation dang neih a tul leh thin bawk nen; he vawiin hi hun rei tak ka lo nghah tawh chu a ni.

.

Min hruaitu chuan thìr kawngkhar khin pui chu a nam tawlh a. A chhungah chuan thla tam hmuh tuma ka lo beih tawh pa pakhat chu a lo thu a. Min hruaitu chuan, “In aw hre phakin tumah an awm dawn lo va. Khitah khian CCTV a awm a, in aw a record tel lo va, in chevel erawh kan lo thlir reng dawn che u a ni,” a ti a. Lawmthu ka hrilh hnuah ani chuan min chhuahsan ta nghal a.

.

Ka hmaa thu chu Mizopaah chuan pa vantlang tak tur hi a ni a. A hmuihmul leh a bekhmul te chu a met fai lo va, chu chuan a hmel lan dan chu a ti hnawk hle a. Chumi phena a khabe ruh invuah nghet tak leh a biang ruh kual mawi tak erawh chuan pa hmaitlang chhelo tak a ni tih min hriattir a. Ka hming leh ka hnathawh te ka hrilh a, “Ka lo kal chhan hi an hrilh che em?” ka ti a. Ani chuan, “Min tanpui duh niawmin an sawi che a. Mahse ka fa rual lek i ni. Ka hmuh tum angin ka hmu hauh lo che,” a ti a.

.

Ka nuih a za lo va, lungawilohna erawh ka nei hran lo. Za lo tak erawhin ka nui lui a, “An sawi chu a dik a nih chu,” ka ti a.

.

“Keimah ang hi mi engzat nge i tanpui tawh?”

.

Chu zawhna chuan mi ti hrilhhai deuh a. “Thil sual ti tute hian chhan nei lovin eng thil mah an ti ngai lo va. Mipuite`na kan lo thlir ang ngawt hi a ni thin lo. Kei chuan thubuai tam tak hi police emaw, dan hremi ukil te ang ni lovin ka luhchilh a, pawikhawihna phena thuruk inthup chu ka haichhuak a, mite lo thlirna ang ngawt hi a lo ni thin lo a ni tih mipui hmaah ka tarlang a. A hmaa mipui huat rawn pawikhawihtute chu anmahni hrethiamtu leh an lamtang mi tam tak ka neih let sak leh thin a ni,” ka ti a.

.

A ngawi vang vang a, “Ka hmingchhiatna thai bo theih i inring a ni maw?” a rawn ti a.

.

“A phena thuruk awm azir leh tuna i rilru puthmang azir a ni ang,” ka ti a.

.

“Ka pawi khawih kha siamthat leh theih a ni tawh lo.”

.

“Ni e, mahse ngaidam theitu che Pathian a awm ve bawk.”

.

A hmel lan dan chu a hnual hle a, a mitmengah erawh thinrimna a hmuh theih a. “Min hringtu ka nu leh pate leh ka thisen zawmpui ka chhungte ngei pawhin min tuithlar a. Kawtthlerah mipuite chu ka hming hnaisailo lamin, “Khai hlum rawh se,” tiin an au a. Chanchinbu tinah ka hming chu ar chuk tui lo ai pawha tuihnailo zawkin an chhuah a. Pawi sawi ve lo ka chhungte chenin mipuite chuan an thinhrik a, khaw hawi ngaihna reng reng hre lovin an siam a. Chung mihring tam tak, ramhuai ai pawha min tih zawk tute chu ka lam tangah i siam thei ang maw?!” a ti a.

.

Thawk ka la dat a, “Ka theihtawp ka chhuah ang. Mihring ve bawk erawh ka ni a, i pawi khawih rapthlak ti em em tute zinga mi ve bawk ka ni. Mahse i hming an lamin, “Khai hlum rawh se,” tiin ka awka ka chhuah ve lo va. I nupui fanaute leh nangmah hmangaihtu i chhungte nangmah avanga an tah nasat tur zia hi ka ngaihtuah fo thin. He khawvelah hian mihring kan tam em em a, chung zingah chuan, i hming an lam apianga, “Thi rawh se,” ti a au ve ngai lo, keimah ang hi mi tam tak an awm ve bawkin i ring lo em ni?” ka ti a.

.

A hmel lan dan chu a danglam a. A mitmengah chuan lungngaihna, hrehawmna leh beidawnna te ka hmu a. A indawmkun ngawih ngawih a, “Ka thah tak chhungte min thlir dan turin min thlir chhin tawh em? An chan kha i chan angin i suangtuah ve chhin tawh reng em?” a ti a.

.

“Kil tin atang i dinhmun hi ka thlir a. I pawikhawihna tuartute chan pawh ka chanah ka dah thin a, ka tahpui nasa asin. I pawi khawih kha i hmangaih ngawih ngawih i chhungte chunga thleng angin han ngaihtuah ve chhin teh,” ka ti a.

.

A thawk lak a chawl a, a ngawi vang vang a. Reilo deuh hnuah chuan a rawn rum chhuak hawk a, tahhmuam aw lek lek hian, “Awmzia a awm tawh lo. Ka thah takte kha an lo let tawh dawn lo va, eng thil mah siam that leh theih a ni tawh lo,” a indawmkun tlawk tlawk a, “Ka chhungte chunga thleng ve tur atan chuan ngaihtuah pawh ka ngaihtuah ngam lo. Eng mihring nge maw ka nih tak le?” a ti a. A kut pahniha a hmai hupin a indawmkun ngawih ngawih a.

.

“Khatih laia thil thlen dan kha chiang takin i la hria em?”

.

“Ka ngaihtuah nasat poh leh mak ka ti tulh tulh a ni ber mai. Ka mumangah erawh ka mang awl lo,” a ti a.

.

“Kha thil kha i chhia leh tha hriatna fim tak hmanga ti i ni em?” ka han ti leh a. “Ka tih chu a ni ngei si alawm,” tiin min chhang a.

.

“Khami zan khan i rui em?”

.

“Nidanga ka tawng tuina tawk chu ka in.”

.

Kan ngawi dun vang vang a.

.

Nakinah chuan, “He i pawikhawih chungchangah hian rilru lam doctor, psychiatrist te nangmah hmu tur chein an lo kal tawh reng em?” ka han ti a.

.

“Mi thenkhat chu an lo kal ve bawk. Mahse an mitmeng chu ka lo chhiar thin a, thi tura min duhtute vek an ni. Vengtu tel lovin ka kiangah an awm ngam lo va. Chutiang mi chu engah nge ka rin bik tehlul ang a, thudik ka hrilh bik ang le? Mí awih hleih lo tur sawi mi ka ni si lo.”

.

Thawk ka la halh a, “ ‘Ka pu,’ tiin ka ko mai ang che aw... Chung ang mi chu ka ni ve lo tih i hriat avangin ka lawm e. Ka sawi leh sawi hnu, he thilah hian puih che ka duh a, chumi avang chuan i lamtang ka ni e ka tihna erawh a ni chuang lo. Engkim hi chhan nei veka tih a ni a. I pawi khawih pawh hian chhan a nei ngeiin ka ring, chu chu tuma hnenah i la sawi lo tih ka hria. Kei chu i lamtang emaw, tu lamtang mah ka ni lo va, i tualthahna phena thuruk, thudik hriat tuma lo kal ka ni. He i pawikhawihna phena i thuruk thuhruk chu min hrilh la, chu chuan awmzia a nei a nih phawt zawngin i hming an sawichhiatna zawng zawngte, i chanchina a chhe lai ringawt an hmu lian em em mai te, mi nunrawng leh mi rapthlak ber ang hiala an ngaihna che hi ka thlak danglam sak ngei ang che,” ka ti a.

.

A hmelah chuan a inngaihtuah nasa hle a ni tih ka hria a. A indawmkun vang vang a, a rawn dahchhuah leh chuan, “Mí awih hleih loh tur thil sawi hi ka duh ngai lo va. Nang erawh ka mi rin zawng i ni a, ka nuna thil thleng mak tak hi ka hrilh ang che. I awih emaw, awihlo emaw, ka thu sawi tur hi dawt a ni dawn lo va. Mahse, sei tak sawi a ngai ang,” a ti a.

.

“He khawvelah hian thil mak tak tak a thleng fo tawh thin a, a lo la thleng zel bawk ang. Chuvangin mite thil mak sawi hi ‘Ka awih lo’ lo tih sak ngawt thin tur a ni ngai lo. I thusawi tur chu han sawi ta che, ka lo ngaithla ang e,” ka ti a.

.

A chil a lem khalh a, “Ka chanchin an sawi te kha thudik tak vek a ni. Ka hun hmasa lam erawh a pawimawhloh avangin ka sawi lovang a. Ka tunhma chanchin i lo chhui a nih pawhin, mi sawi i hriatte chu thudik a ni turah ngai ang.

.

“Ni e, an sawite kha thudik zikthluaklo awm ve bawk mah se a tam zawk erawh thudik vek a ni. Ka hun hmasaah erawh an sawi anga mi nunchhia leh nunrawng erawh ka ni lo. Hnathawh mumal ka nei lo va. Ka tleirawl chhuah sual ka bansan har avang leh ka nuna a thalo lam ka inhneh tir avangin lehkha ka zir sang lo va. Mite ngaiha hna hnuaihnung pawh thawk hreh ngailo ka nih avangin hnathawh tur ka hmuh apiang ka thawk thin. Pen aiin, chem, tuboh, bawngtuthlawh leh suahdurte chu ka chelek tam zawk a. Chutiang chu ka dinhmun a ni a, ka eizawnna pawh chu chu a ni.

.

“Mipa fa lo nih chuan nupui a chhia a tha kan lo duh ve a. Nupui neiin karah fanaute hial an lo piang ve a. Khawvel hmasawnna thang chak lutuk leh thil man to chak lutuk te, nitin khawsakphung inthlak danglam chak lutuk te chu ka rilru ti buaitu an ni thin.

.

“Ka sawi tawh angin ka eizawnna chu hnathawh tur ka hmuh apiang thawh a ni mai a. Ka sum dehchhuah leh kan khawsak a inmil thei thin lo va, chu chuan tu hriat lohvin ka rilru a ti hah hle thin. Mite anga nuamsaa khawsak ve theih ka chak thin a, mahse ka dinhmuna ka din chhanah chuan tumah puhmawh thei ka ni lo va, keimah leh keimah ka insawh ka insawh mai thin.

.

“I hriat tawh angin ka tleirawl chhuah hlim atang ruihtheihthil khawih ka ching ve thin a. Chu dinhmun harsa tak atang chuan talchhuak tawh mah ila, ka hun tawnin a zirloh chang te, ka rilru a hah changte leh thinrimna ka neih changte hian zu inah ka tlak thin a. Zu ah chuan hahdamna ka zawng a, ka buainate chu zu nena hmachhawn ka ching a. Chu chu chin dawklakah ka nei a, a tha lo tih hrereng chunga ka tih luih, dinhmun chhe tak atanga dinhmun chhe lehzual zawk leh hnuaihnung zawka min hnukthlatu chu chu ka thil chin chu a ni.

.

“Ka nuna thil mak tak a lo thlen hun kha lehkhathiamlo leh pa chimlimlo tih takah chhinchhiah nachang ka lo hre lo va. Kha zan lungngaihthlak taka pawi rapthlak ber ka khawih hma kum chanve vel erawh a nih ka ring. Chutih lai chuan ka dan ngaiin hnathawh tur ka hmuh apiang ka thawk thin a. Mahse chutih lai chuan mak deuh maiin ka hun hman dan hriatloh ka nei ta fo mai a! Khatih lai khan zu ka in tam ngai lo va, rui khawpa ka in lohna chin pawh rei tak a ni tawh. A tirah chuan chutianga ka hun hman dan ka hriat loh chuan darkar khat te a awh thin a. Chutih chhung chuan eng nge ka tih a, engtinnge ka awm ka hre ngai reng reng lo! Ka harhchhuah hnuah ka kianga lo awmte chu ka zawt leh he hu thin. Ka awmdan chu a diklo a ni tih ka hria a, mak pawh ka ti hle a. Mahse tihngaihna ka hre chuang lo va, ka thisen chakloh vangah ka puh leh ringawt mai thin.

.

“Hun a lo kal leh deuh a. Ka hun hman dan leh ka awmdan ka hriatloh chuan nikhat te hial a awh chang a awm ta a. Chutih chhung chuan ka lo mu mai mai ngai hauh si lo! A chang chuan hna te ka lo thawk a, len te pawh ka leng a, zu ka lo in chang te pawh a awm hial. Chutiang chu ka dinhmun leh ka awmdan chu a ni a. Chu ka thil tawn mak leh dangdai tak erawh chu tu hnenah mah ka sawi chhuak ngai lem lo.

.

“Mahse ka khawsak phung chu thil nihphung pangngai ni miau hek lo le, ka chhungte leh chutianga ka awm changa ka hnaiha awmte chuan damdawi rui turah min ngai thin a. Mahse ka duhthu ni lova nikhua ka hriatloh laia ka lo rui a nih loh chuan damdawi chu ruih tumin ka hmang khawlo ngailo a ni.”

.

Chu thu a sawi lai chuan ka rilruah rilru lam natna mak em em mai, mithiamte`n Multiple Personality Disorder an tih chu a lo lang a. Chu natna chu keimah ngei pawhin lo zirchiang ve tawhin, chu natna behchhan chuan novel pakhat, ‘Thuruk’ tih chu ka lo buatsaih ve hial tawh a ni.

.

A thusawi chu ngaihnawm tiin mak ti viau mah ila lo pawtchat lo thei niin ka inhre lo va, “Ka pu, min lo hrethiam lawk la, i awmdan i sawi chu mak ka ti kher mai. Chutianga i awm chang chuan nangmah hrechiangtu i nupui emaw, i chenpui i chhungte dang tu emaw i kiangah an awm ngai em?” ka lo ti a.

.

Ani chuan, “A mak khawp mai, darkar tam chutianga ka awmdan hre lova ka awm lai chu ka chhungte hnaiha ka awm loh lai nen a innang fo thin zawk a ni. Inchhunga ka awm laia chutianga ka awm chuan darkar tam a awh ngai meuh lo tlat thung. A chang chuan ka hnathawhna hmuna ka awm lai te, zu hmuna ka awm lai te leh khawlaia ka lenchhuah lai te hi a ni leh tlat thin, ka han harhchhuah leh hian inah ka lo awm ngai tlat lo a ni,” a ti a.

.

‘Chhei raw! He ka thil buaipui phenah hian thil mak tawpkhawk, thuruk thuhruk chu a awm ngei dawn e,’ ka ti rilru a. Ka rilruah chuan Multiple Personality Disorder, tunhnaia Dissociative Identity Disorder an tih tak bawk chu a rawn lang awn awn a.

.

Chutiang natna veite chuan Alter (mithiamte`n a hming an phuah) an tih mai chu an nei thin a. Alter chu anmahnia midang awm ve ti ila a fiah ber awm e. Alter hi MPD natna vei mi thenkhat chuan pakhat mai ni lo, pahnih atanga sawm chuang lai neite pawh an awm! An alter a rawn inlan tawh chuan anmahni chuan nikhua an hre tawh thin lo va, an alter chuan a thunun vek tawh thin a ni. MPD natna vei, alter-in a thunun tawhte chu mitthi ni chunga la che ve thei ang chauh an ni a, alter-in a tih duh chu a thunun mihring chuan a ti hmiah hmiah tawh mai thin a ni. Chutianga alter-in a thunun theih hun chhung chu minute reilote atanga thla tam tak te pawh a ni thei hial a ni!

.

Alters te hi nihna hran nei an ni a. An thunun tak mihring nen chuan lei leh van ang maia mize inpersan te pawh an ni thei. Alter pakhat chu mi pakhata minung dang awm ve a nih avangin lo pian ni, thla leh kum te a nei a, hmel landan bik pawh neiin a thunun mihring landan ti danglam vek thei khawpa hmel danglamin a rawn langchhuak thei thin a ni.

.

MPD natna vei mihring chu a alter-in a thunun tawh chuan a hmel landan a danglam vek thei a, chutiangin a mizia, hawiher leh awphawi thlengin a danglam vek thei thin a ni. Alter te hi an inang vek lo va, thenkhat chu mi tha leh fel tak an nih laiin thenkhat thung erawh chu an sualin an thunun tak mihringin a tih duh ngai reng reng loh turte thlengin an tih tir thin a ni.

.

Mithiamte chuan MPD natna veite chu a tlangpuiin mihringin a tawrh zawh rual loh rilru natna, lungngaihna emaw beidawnna tuar a, hneh zo ta lo te hi an ni an ti a. Chutiang mite chuan an rilru natna chu anmahni maia hmachhawn turin chakna an nei tawh lo va, chutah chuan anmahni pui turin anmahnia midang awm ve, alters te chu an lo piang ta thin a ni. MPD natna veite chu hypnosis hmanga dawimut an nih chuan psychiatrist thenkhat chuan an alters-te chu an kawm thei thin a. Mahse chutiang ti thei tur chu kan Zoramah hian an awm ve kherin a rinawm loh.

.

Chung zawng zawng ngaihtuah chung chuan ka hmaa thu chu ka han en a, MPD natna a vei loh reng ka ring lo. A hmel hnual em em mai chuan khawngaih thla a la hle a, a hma hun tur ka han ngaihtuah a, a thim zual sawt ni hian ka hria a, ka lainat kher mai. A tihsual ni hauh lovah a nunna hial a chan ve thei a ni tih ka hria a. Chutih hunah chuan thil tam tak ngaihtuahin ka ngaihtuahna a vir kual vel ruai a.

.

“Ka sawi ang kha ka awmdan chu a ni. I awih emaw, awihlo emaw, dawt ka sawi si lo. Ka awmdan kha keimah ngei pawhin mak ka ti a, hriatthiam harsa ka ti asin. Rilru lam doctor rawn tur em ni dawn tih rilruk chang ka nei fo thin a, mahse ka Mizopa rilru a lo lian a, ka taksa chak tawkloh vangah ka puh thlu leh thin.”

.

Chu thu a sawi lai chuan amah ka kawm theih hmaa an vengchhung nu leh pa tam tak ka kawm kualnaa an thusawite chu ka rilruah a lo lang a. Ka mi kawmte chuan zu a in ve thin thu an sawi hlawm a, mahse midang tana harsatna thlen emaw midang tana hnawksaka a khawsak ngai an hriat loh thu an sawi vek a. An veng YMA President ngei pawhin a tunhma nunah khawtlang tana hnawksak zawnga a chet ngai leh midang tana harsatna siam zawnga a khawsak a hriat ngailoh thu leh chutianga mak tak maia rapthlak taka a che ta mai chu mak a tih thu a sawi a nih kha.

.

“Krismas leh kumthar kha hlim takin chhungkimin kan hmang a. Hunpui a nih avangin zu erawh ka thlah lo va. Amaherawhchu ka sawi tak anga ka awmdan hriatloh erawh ka nei ngai lo.” A thusawi lai chu a chawl a, kan inkara dawhkan inhung chu ngui deuhin a melh reng a. “Khami tlai khan zu ka in a. Mahse nidanga ka tawng tuina tawk vel bak ka in chuang lo. Khawia ka awm lai nge tih leh engtik laiin nge ka hre lo, nikhua hre miah lovin ka lo awm leh a. Ka harhchhuah leh meuh chuan engtiklaia ka tei luh nge tih ka hriat miah lohna inchhungah chuan ka lo awm a, ka kiangah chuan miruang a lo let pheng phung a....” Sawi chhunzawm thei lovin a kha a chih a. A thisen kal lai te chu a tawp ta emaw tih turin a mit pawh a khap reng reng lo va. A mitah chuan mittui a lo tling a, a hmelah chuan lungngaihna vawrtawp chuan hmuh theihin hlimthla a rawn chhuah a. Rei tak chhung chu a ngawi zui ta vang vang a.

.

“Chhuatah chuan thisen a baw neih nuaih a. Ka thil hmuh chuan mi rap ve asin! Ka mumang a nih ringin ka han inthing a, mahse ka mumang mai chu a lo ni si lo. Chutihlai chuan kawngka pawn lamah chuan thawm ri nuaih nuaih ka hre ta a. “A that vek... A vit hlum... Kawngka kha tichhe rawh u...” tihte chu a ka thawm hriat chu an ni a. Chung au thawm ringawt pawh chu nghaihthlak hrehawm khawpa rapthlak a tling a ni.

.

“Thawm chu a rawn nasa zel a. Mite chuan min rawn nangching ngei dawnin ka hria a. Ka tihngaihna hrelo chu pawn bathlar thlanglamah ka tlan chhuak a. Chu hmun atang chuan thih pawh pawisa lovin ka zuangthla ta a ni.

.

“I hnena ka thusawiah hian tawngkam khat chu sawi loh, thumal pakhat lek pawh dawt a tel lo. Engvanga ka tih ni a inhre silo manganga tlanchhe ta mai nge ka nih i hre duh ngei ang tiraw? A chhanna chu keipawhin ka hre biklo a ni; a mak tih mai loh chu! Nikhua ka hriat tirha ruang lo let reng ka hmuh te kha ka khawih lai reng reng ka hre lo va. Mahse ka kuta thisen kai hnuang ka hmuh erawh chuan ka tih lai hre si lovin ka chhungrilah ka sulhnu ni a hriatna erawh ka nei tlat thung si a ni!

.

“Engkim kha ka mumang hriat ruai a, a thleng puat puat ni mai khan ka hria. Khatia ka zuangthla ta kha thi ngei turah ka inngai a, mahse thih a hnekin na han sawi tur pawh ka nei si lo. Lei ka thleng a, ka han inbeng kang leh chu thalai rual hian min lo hual a, min sual rawn ta nghal a. Thiamthu sawi tur ka nei lo, “Ka tih a ni lo,” tih chauh lo chu. A chhan chu ka tih a nih leh nih loh ka hre si lo va. Chumi hnua thil thlen dan chu i hriat hnu vek a ni tawh a, kei aiin a hriat pawh i hrechiang zawk hial tawh ang.”

.

Hun rei vak lo chhung chu kan ngawi dun vang vang a. A tawngchhuak hmasa zawkah tangin, “I pawi khawih lai chu i hre miah lova maw?” ka han ti a.

.

Thawk a la halh a, mitmeng hriatthiam harsa zet hian inchung lam chu a melh reng a, chumi hnu chuan ka mitah min rawn en a, “Ka nunna hi chu tinther ai pawha hlut lo zawk mi tam tak an awm a, ka nunna ni lo, a aia hlu zawk min hmangaih ngawih ngawihtu ka nu, ka nu neihchhun nunna hming chhalin chhia ka chham ni rawh se; anni kha thahna chhan tur ka nei lo mai ni lovin ka mi ngainat em em leh anni pawhin nau ang tak taka an en ka ni asin! Khatiang kha an chunga tih duhna chhan tur ka nei lo! Ka hmelma an ni lo va, khatiang kha chu ka hmelma chungah pawh ka tih duh ngailoh tur a ni si. Thil thlen dan kha ka hrethiam lo; ka hrethiamlo takzet a ni,” a ti a. A awka chhuak chu a ril ruih a, a tahhmuam aw lek lek a.

.

“Pawisa i dil a, cheng 1000/- an pe che a. I duhtawk loh avangin a dang i dil belh leh a. Anni`n an lo remti tawh si lo va, khatiang khan i che ta mai niin an sawi a.”

.

“Ni e, chutiang chuan ka hnenah pawh an sawi. Mahse tlangval, thudik tak ka hrilh ang che; pawisa dilna chhan tur ka nei lo va, anni pawhin min pekna chhan tur an neih ka hre lo,” a ti a.

.

Kan ngawi dun vang vang a. Chutih hunah chuan ka rilru chu a vak vel ruai a. A hmel, lungngaihna chhumpuiin a hual vel chu ka thlir a, “Min hrilh duh riau i nei em?” ka ti a. “Tunah tak chuan ka rilru a mang vek a ni ber mai. Ka hriatloh thil te chu min hrilh zawk ta che. Midangin an sawi chuan ka a mai dawnin ka hria a, ka beng ka chhu ngawng lui hial thin. Tun hi a hun a nih ka ring, khami zana thil thlen dan dik tak an sawite chu min han hrilh ta che, ngaihthlak ka lo tum ang e,” a ti a. Ngun takin ka inngaihtuah a, thil thlen dan dik tak hrilh chu a pawina awmin ka hre lo va, ka hrilh ta a.

.

“Ni 9.1.2015 Zirtawp zan dar 7:30 vel a ni a. Pu Siama te inah chuan lutin cheng 1000/- i dil a. Pu Siama chuan tha takin a lo pe che a. A dang i dil belh leh a, mahse a remti ta lo va. Chu veleh Pu Siama chu i vit ta nghal mai niawm a ni! Chu thil thleng lo hmutu Pu Siama farnu chu hlau leh thlabarin a tlanchhia a, pawnah tlanchhuah a tum a, mahse a tlanchhuah hman hmain i nangching a, inchhungah hnuk lut lehin i vit zui veleh nghal a.

.

“Chumi hnu chuan kawngkapui chu inchhung lamah i kalh a. Nu ber bedroom-a tlanchhia chu umzuiin i vithlum leh a, chumi hnuah Pu Siama nau fapa, rawlthar kum 14 mi chu i bitum leh a. Chu mai pawh chu duhtawk lovin Pu Siama te fapa, mipa naupang kum 5 mi lek pawh chu i zuah ta chuang lova ni.

.

“Chumi hnu chuan pawn lama mipui thawm chu hriain i mangang ta a. Tlanchhiat ngaihna a awmloh avangin a kawng awmchhun ni a lang veranda tlanglam atanga zuanthlak mai chu i thlang ta a. Vanneihthlak takin i insawh na lo hlauh a, mahse mipui lak ata chu i him thei ta chuanglo a ni.

.

“Na taka i hliam mipa naupang kum 5 mi chu damdawiin thlenpui a nih hmain a hliam tuar lovin a boral a. Pu Siama te awmpuinu chu bathroom-a a lo inkalhkhum hman avangin a him hram bawk. An tlangval erawh a thiante ina chaw a ei chhuah tum a nih avangin thil thlen lai hian inah a awmlo hlauh a, a vannei ta a ni.”

.

Chu thu ka sawi zo chu a kut khinghniha a lu dawmin a thu kun tlawk tlawk a. A mit vun leh a heh tlangte chu a khur der der a. A mit atang chuan mittui chhiarsenloh a lo luang chhuak a, a thinlung chu na taka hliam a ni tih ka chiang kher mai. Zawite, thinlung puakkehin a rawn hrin tih hriat em em hian a rawn rum chhuak a, “Van mite u, engah nge he anchhia hi ka chungah a tlak bik le...? Ka tih a nih nameuh zawngin, dam ve tlak ka ni lo ve,” a ti a.

.

Dawhkanah chuan a kiu nghatin a indawmkun tlawk tlawk a, a mit atanga mittui luangchhuakte chu hruk hul sen rual a ni lo; dawhkanah chuan a far thla zung zung a. Chutih chhung zawng chuan keichu sawi tur reng reng hre lovin ka lo thu ngawi reng a.

.

Nakinah chuan, “Tlangval, thudang min hrilh leh tur i neih loh chuan min kalsan thei tawh em... Tunah rih chuan kawm tlak ka nih pawh ka inring ta lo,” a ti a.

.

“Sawi dun tur tam tak kan la nei asin. He hmuna i awm hnu hian nikhaw hre lova awm i nei leh tawh em?”

.

A ngawi vang vang a, a mitah chuan mittui a la tling a, a bianga a mittui luanna pawh a la hul lo va. “Ka hrethiam lo, ka hun hman dan hi ka hrethiamlo a ni. Mahse ka thusawi ni a ka hriat miahloh, ka sawi lai pawh ka hriat loh chu ka lo sawi a ni awm e. Chu chu ka tanpui mi pakhat hnena ka sawi a ni an ti a, jail atanga ka chhuah hunah phuba lakna tur ka la nei niawmin tawngkau ka lo cheh a ni awm e, mahse chu thu ka sawi lai awm chu ka hre reng reng si lo,” a ti a.

.

A hmel chu lungngaihnain a khat a, a mitmengah chuan lungngaihna leh beidawnna chhiarsenloh hmuh tur a awm bawk a. Thil tam tak sawipui chi niin ka hre ta lo va.

.

“Kei chuan tihtheih ka nei tlem hle a. Mahse ka thutiam erawh chu ka hlen thin. I hnena ka lo tiam tawh chu ka ti hlawhtling ngei ang. Chutih rual chuan tun tuma nangnena kan inkawmna hi a tawpna ni nghal lo se ka duh a. Thil tam tak tih dun tur kan la neiin ka hria a, theihtawp chhuahin tanpui che ka inhuam reng a ni tih hria la ka duh a ni.

.

“Mithiam ka ni lo va, mahse i nihna dik tak hi hrilh che ka duh; misual i ni lo va, tualthah hmang i ni hek lo, chu chu inhria la ka duh a ni. Tunah hian rilru lam natna mak tak i vei niin ka hria a, chu natna lak atanga tidam theitu tur che chu ka zawng ngei ang tih ka tiam a che.”

.

A lu a thing a, tah aw tiau hian, “Tlangval, i lakah phut ka nei lo va, thil min tihsak turin ka duh hek lo che. Mi pangate thisen mawh chu ka phur a, he khawvel leh khawvel piahlam thleng pawhin ka chan tur chu rel fel sa a ni tawh. Kan inhmuh leh kan inkawm hi a tawpna ni se... Ka thinlung erawhin a hre reng ang che,” a ti a.

.

A hmel chu ngun takin ka en a, ka khawngaih kher mai. Sawi tur ka hre lova, ka ngawi reng a. Ani chu mite chuan tualthattu tiin thi ve turin an duh a, mahse Isua`n a hmangaih tih ka hria.

.

Chutia kan ngawih dun vang vang lai chuan tang vengtu a lo kal a, “In hun a tawp e,” a rawn ti a. Muangchangin ka tho a, “Ka pu, ka lo tawngtaipui reng thin ang che,” ka ti a. Min en lo va, ka thusawi chu hre awm pawhin a lang lo. A ngaihtuahna chu hla takah a awm niin ka hria a, amaha midang awm ve hlimthla chu ka hmu a!

.

Pawnah ka chhuak a, chhum lei vak a lo zing chuai a. Ka hmaa taxi chu ka pan a, Aizawl khawchhung lam panin kan inkhalh chhuak nghal a. Ka mitthlah chuan ka kalsan tak mi pakhat chu a cham a, ka rilruah chuan mitthi tawh mi pangate chu an lo lang bawk a, an zavai atan ka rilruin ka tawngtai a.

(Supernatural Fiction, Suspense Thriller leh Horror Short Story dahkhawmna ‘TISA PIAH LAM’ tih lehkhabu chhunga thawnthu pakhat lakchhuah a ni e.)

***